Maqueta do 'Xatcobeo', primeiro satélite galego. AGN O proxecto galego de 'picosatélite', denominado Xatcobeo, atópase actualmente na fase de deseño e a súa construción comezará en outubro deste ano, se ben os investigadores non descartan que o seu lanzamento, previsto para finais de 2009, se atrase ao 2010.

A iniciativa está sendo desenvolvida por estudantes das escolas de Telecomunicacións, Enxeñaría Industrial e Informática da Universidade de Vigo, co apoio da Xunta e a supervisión do Instituto Nacional de Tecnoloxía Aeroespacial (INTA). Segundo explicou o investigador principal, Fernando Aguado, no período maio-xuño comezaría a fase de revisión crítica do proxecto, de cara a poder fabricar e integrar o satélite en outubro.

Estes prazos permitirían ter preparado o satélite, o primeiro 'cubesat' español, para o seu lanzamento en decembro do 2009, aínda que os investigadores prevén que esta data oficial "sufra un atraso de varios meses", polo que "o máis probábel" é que se lance no segundo ou terceiro trimestre de 2010, precisou Augado.

En todo caso, o investigador destacou a "implicación e esforzo do alumnado" posto que "está a resultar clave para que o proxecto siga segundo a planificación prevista dende o comezo".

Avaliado por todo o mundo

Paralelamente ao desenvolvemento do Xatcobeo nas instalacións da Universidade de Vigo, a iniciativa está sendo presentada en congresos e conferencias en diversas partes do mundo. Recentemente, o proxecto expúxose no 'Cubesat Developers' Workshop na universidade de Calpoly, California Politechnic State University.

Ademais, o próximo setembro, responsábeis do proxecto acudirán á Conferencia Mundial Aeroespacial que se celebrará en Corea del Sur.