Lixo acumulado nunha rúa de Vigo. Carlos Fernández/AGN Segundo o preacordo logrado sobre as 2.15 horas de hoxe, tras unha negociación que durou unhas 8 horas e que contou coa mediación do Concello de Vigo e a Inspección de Traballo, o convenio colectivo inclúe un aumento salarial do 3 por cento no primeiro ano e tamén do 3 por cento, aínda que cunha cláusula de revisión con garantía do 2 por cento, para os tres seguintes anos.

Fontes sindicais explicaron a Europa Press que o acordo, ratificado por unanimidade, tamén "abre o camiño" cara á consecución da cuarta paga extraordinaria, posto que se abonarían 6 días no terceiro ano de vixencia, outros 6 días no cuarto e a consolidación quedaría para a negociación do próximo convenio colectivo.

Ademais, a xornada laboral será de luns a venres, tal como demandaban os traballadores, e empezaría a aplicarse a partir do 10 de outubro; e se porá en marcha unha bolsa de contratación para os traballadores eventuais.

Fontes sindicais explicaron que se trata dun acordo "moi positivo" e agradeceron a mediación realizada polo Concello –que instara as partes a negociar e a que non se levantasen até que houbese acordo”– e Inspección de Traballo.

Recollida

No momento de celebración da asemblea, as rúas da cidade acumulaban unhas 1.050 toneladas de residuos –a pesar de que todos os días da folga se cumpriron os servizos mínimos–. A partir das 14.00 horas de hoxe comezarán os labores de recollida e, segundo as estimacións dos sindicatos, o centro da cidade quedará limpo esta noite, mentres que o resto podería estar listo o sábado.

Para o comezo da recollida de lixos, ademais do persoal correspondente á quenda de tarde –que entra ás 14.00 horas– tamén acudirán, a modo de reforzo, voluntarios da quenda de mañá, que hoxe non traballou posto que a folga non se desconvocou até que se celebrou a asemblea.

O persoal, formada por uns 370 efectivos, comezou a folga ás 6.00 horas do luns debido ao seu rexeitamento da oferta inicial da empresa en materia de salario, que suporía "unha rebaixa de entre o 7 e o por cento", e polo incumprimento no que respecta a xornada laboral.