Entrevista a Suso Baleato, coordinador de Mancomun.org a principios de 2009. Bocixa / R. Rei / M.V

Que vantaxes ten o software libre?

Os que non son técnicos, a primeira vantaxe que ven é que se pode descargar de internet gratis. Tamén é importante a cuestión legal. Moita xente ten programas na casa polos que non paga licencia, de forma ilegal. Ademais, a configuración legal das licencias e a súa arquitectura aberta do código permítennos traducir programas de forma sinxela, rápida e a moi baixo custe; o que non sucede nas aplicacións de pago.

Pero iso do código aberto, non é só para informáticos?

O software libre non é só programación. Tamén é comercialización, difusión, tradución, etc. No caso de Galicia, o traballo céntrase en dúas areas.

Cales?

A de localización é a máis importante. Os voluntarios traballan con comunidades internacionais para traducir programas, en colaboración coa Xunta. A outra parte é o tecido asociativo, no que participan os grupos de usuarios de Linux, que fundamentalmente promocionan as ferramentas. Logo están os xestores de negocio, a Asociación Galega de Empresas de Software Libre (AGASOL), un ente pioneiro no Estado e na UE. Ademais dos interlocutores institucionais, como Mancomun.org. e as oficinas universitarias.

Con Mancomun.org é a primeira vez que a Xunta, a través de Industria, investiu en software libre. Con que resultado?

O éxito percibiuse nas empresas, nos concellos e nos centros educativos; onde se triplicou o uso. Na implantación de software libre nas empresas somos líderes no Estado. Os números están aí e demostran que foi realmente de éxito. Ademais, a Comisión Europea, chámanos continuamente para asesoralos e a universidade da ONU sinalounos como referente.

Tamén é certo que unhas consellerías apostaron máis que outras...

Se cadra faltou un empuxe máis contundente, máis decidido; ese aspecto podería ter sido mellorado. Pero iso non quita que o esforzo fique aí e sexa aproveitábel para o novo Goberno.

Fala do novo Goberno. O programa electoral do PPdeG apostaba especificamente polo software libre...

Á vista do programa, a continuidade de Mancomun.org non só non corre risco senón que debe ser potenciado necesariamente; pois a aposta que fai o PP non só require usar os recursos existentes senón multiplicalos, e por moito. Temos unha aposta sobre o papel, que nos fala dunha implantación efectiva na administración. Desexo que sexa así e non temos porque desconfiar. Iso si, as condicións de mercado, da industria tecnolóxica galega e da administración son as que son.

Que quere dicir?

As políticas de implantación de software libre na administración están moi estudadas e non ten sentido inventar a pólvora. Hai un camiño, que é o que terá que seguir o novo Goberno se efectivamente ten pensado cumprir a promesa. Por iso non hai outra alternativa que potenciar o que xa hai.

Pero os que usan software libre, non teñen demasiados problemas de compatibilidade?

Non, está baseado en estándares abertos e pensado para traballar en rede. Isto permite usalo con sistemas operativos distintos, con ordenadores distintos e con versións distintas. Por exemplo, o OpenOffice.org –software libre– permítenos abrir documentos de calquera versión do Microsoft Word –software privativo–. Todos estes problemas de ‘non me mandes en Word 2000 que eu teño Word 97’ remataron.