Emilio Pérez Touriño na rolda de prensa posterior ao Consello. Ana Varela

Na última rolda de prensa do Consello da Xunta, o máximo mandatario galego explicoulle á prensa que abandona a Presidencia con "bo ton persoal" e coa "percepción subxectiva e intransferíbel" de "responder ao compromiso adquirido con Galicia".

Ademais, asegurou ter posto, durante a pasada lexislatura, toda a súa "capacidade, intelixencia e vontade" ao "servizo de Galicia". "Espero contribuír con Galicia de xeito positivo, polo que abandono a Presidencia da Xunta coa sensación de responder ao programa comprometido e ás necesidades do país", destacou.

Tras indicar que aceptou "democraticamente" o resultado das eleccións do pasado 1 de marzo que devolveron a maioría absoluta ao PPdeG e que asumiu "voluntariamente" a responsabilidade política polo ocorrido, utilizou unha "frase tópica" para "resumir" a "sensación" que lle provoca a despedida do Goberno galego. "A sensación do deber cumprido, como debe ser", subliñou.

No entanto, rexeitou despexar as incógnitas sobre o seu futuro e simplemente confirmou que ocupará o asento que lle corresponde "como membro do Goberno galego" no Parlamento durante o debate de investidura do presidente do PPdeG, Alberte Núñez Feixóo. Sobre a posibilidade de continuar no seu escano, resolveu a cuestión sentenciando: "Nin o sei, nin me preocupa, non estou niso".

Para rematar, agradeceulle aos xornalistas que seguen a actividade do presidente da Xunta o labor desempeñado durante este período e desexoulles "sorte". "Sorte no seu traballo, ánimo, e que o sigan desempeñando tan ben como ata agora, e grazas, de verdade, por haberme aguantado", despediuse Touriño.