Alberte Núñez Feixóo, na comparecencia logo de reunirse con Touriño. AGN Ao termo do encontro, que tivo lugar na residencia oficial de Monte Pío e que se prolongou por espazo de máis de dúas horas e media, o próximo xefe do Goberno galego –o primeiro en comparecer ante os medios– xustificou que a postura da comunidade respecto ao modelo de financiamento autonómico centrase a maior parte da conversación xa que, ao seu entender, é "clave" no futuro máis inmediato e ten unha "gran transcendencia" para os próximos anos.

Así, Touriño facilitoulle un documento relativo á "estratexia" da Xunta nas negociacións co Estado e o resto de comunidades autónomas, proposta que, no entanto, Feixóo preferiu "non destapar" para "preservar os intereses de Galiza".

Con todo, matizou que, aínda que comparte os criterios expostos polo bipartito para negociar o modelo financeiro –como o envellecemento ou a dispersión poboacional–, polo momento non se coñece a "clave" deste tema, as contías concretas que van rexer o modelo financeiro das autonomías.

Orzamentos

Outro dos asuntos que centrou a reunión entre Touriño e Feixóo foi a situación financeira da Xunta, que, en palabras do presidente en funcións, é "razoábel" a pesar do actual momento de crise económica. Así, Touriño asegurou que o bipartito deixa as arcas públicas nun estado "solvente e cunha dotación importante de recursos e de liquidez", polo que concluíu que a herdanza que recibirá Feixóo é "mellor" que a que se atoparon socialistas e nacionalistas á súa chegada á Xunta.

Con todo, Feixóo preferiu evitar "comparacións" porque, alegou, "non serían homoxéneas". Deste xeito, recordou que o anterior Goberno Fraga deixou o poder en agosto, mentres que o bipartito farao en abril. "Loxicamente a execución orzamentaria no mes catro do ano ten que ser inferior á do mes oito", razoou e, en todo caso, apostou por esperar a coñecer a situación "consellaría por consellaría" para dar unha opinión respecto diso.

Á marxe disto, ambos os líderes aparcaron hoxe as súas discrepancias e aseguraron que a reunión transcorreu en ton "cordial". "Este encontro é a explicitación da democracia e foi correcto", agregou Feixóo, quen se mostrou satisfeito pola celebración desta reunión porque lle permitirá avanzar na configuración do Goberno e en cales deben ser as súas primeiras decisións. "Todo ben", resolveu.