Teresa Moure recolle o XIII María Casares a mellor texto orixinal por 'Unha primavera para Aldara'. L.R.

Tíñao bastante claro, con nove candidaturas, das que finalmente levou sete: a primeira vez que Xúlio Lago subiu ao escenario foi para recoller o galardón de mellor iluminación, e contra o final da noite volvería subir para levar o de dirección. Tamén Teresa Moure recolleu a súa xerra, grazas a un texto co que xa gañara o XIII Rafael Dieste, e unha emocionada María Bouzas subiu ás táboas pisando forte recoller o seu como mellor actriz: "Sempre é un pracer estar aquí, na casa, no teatro, e compartir o premio con dous animais escénicos coma Elina Luaces e Luísa Merelas (candidatas ambas as dúas por O club da calceta, de Teatro do Morcego)".

O equipo completo subiu ás táboas do Teatro Rosalía de Castro, da Coruña, para recoller o premio ao mellor espectáculo, de mans do alumnado da ESAD que realizou diversos espectáculos de danza ao longo do evento. Eles, xunto cos zancudos de Zancalino, puxéronlle cor e emoción a unha gala conducida por Josito Porto coa crise como leit motiv, con guión de Mariana Carballal e música en directo a cargo de Anxo Graña. As outras dúas xerras que levou este espectáculo recolleunas Carlos Alonso, pola escenografía e o vestiario que reproduciron un convento en plena revolta irmandiña.

As outras favoritas eran Aeroplanos, de lagarta, lagarta, que finalmente levou o María Casares a mellor adaptación ou tradución de texto. Neste caso, foi Olga Nogueira quen recolleu o premio. Ela trasladou o texto do arxentino Carlos Gorostiza ao galego xunta Avelino González, e ao recoller a xerra anunciou "ao corpus da lingua galega vaille facer falta, nos próximos anos, amais de botar a lingua, ensinar os dentes".

Obra (No comment) de PT Excéntricas era outra das preferidas. Finalmente, recolleron a xerra de Sargadelos que reproduce o rostro da actriz coruñesa Vitor Mosqueira, como actor principal (tíñao difícil, competindo co dúo protagonista de Aeroplanos, Ernesto Chao e Xosé Manuel Olveira "Pico"), e Suso Alonso pola música orixinal.

A diferenza do ano pasado, en que Noite de reis arrasara coas estatuíñas, este ano só houbo unha para o CDG, e foi para a actriz Rebeca Montero, como mellor secundaria, por A boa persoa de Sezuán. Competía con outra das grandes, Belén Constenla, a quen lle deu un sentido bico antes de subir pola xerra, e coa nova e prometedora Lucía Regueiro, ambas as dúas por Unha primavera para Aldara. "Eu hoxe estaba aquí para aplaudirlles a Belén e a Lucía", afirmou a actriz, quen tivo unha lembranza para Marisa Soto, a quen lle recolleu un premio hai anos.

O mellor secundario foi Artur Trillo pola obra de Talía Teatro E ti, quen vés sendo? Outra xerra para os andeis do actor, que coa súa compañía xa conseguira outro por Bicos con lingua no 2004, daquela como protagonista. Por último, o Premio María Casares de mellor maquillaxe foi para Cristina Couto, polo seu traballo para Dáme veleno, eu tamén soñar, de Sarabela Teatro.