Ana Romaní, premio Marisa Soto 2009

A Xunta Directiva da Asociación de Actores e Actrices de Galicia (AAAG) quere así recoñecer o seu labor a prol "do teatro, o audiovisual e da cultura galega en xeral", á fronte do Diario Cultural da Radio Galega, que dirixe dende hai 19 anos, e é un dos programas diarios de información cultural máis veteranos da radiodifusión galega. Comezou en 1990 e concíbese como un espazo de información, plataforma de divulgación cultural e foro de reflexión e debate atento ás novas fórmulas artísticas e creativas.

Ana Romaní (Noia, 1962) acadou xa recoñecementos coma o I Premio Irmandade do Libro (1992); o Premio Xerais á cooperación no labor cultural (1999); o Premio San Martiño á Normalización Lingüística e Cultural (2002); o Premio da Asociación de Escritores en lingua Galega (2007); o Premio ao Fomento da Lectura na modalidade de radio da Federación de Gremios de Editores de España (2007); e o Premio Atlantida á xornalista radiofónica do Gremi de Editors de Catalunya (2008).

Amais, é autora dos poemarios Palabra de Mar (edición de autora,1987), Das ultimas mareas (Espiral Maior, 1994), Arden (Espiral Maior, 1998), Love me tender. 24 Pezas mínimas para unha caixa de música (colección "Poeta en Compostela", 2005) e o conto "Marmelada de amoras" (colección Biblioteca Nova 33, 1997). A súa obra está recollida en diversos libros colectivos e antoloxías.

Tamén realizou a Antoloxía de Antón Avilés de Taramancos (Galaxia, 2003), coordinou e promoveu o volume de relatos Narradio. 56 historias no ar (Xerais, 2003) do Diario Cultural da Radio Galega, e o Premio Diario Cultural de Teatro Radiofónico organizado pola Radio Galega e o CDG (2006).  É autora das biografias de María Mariño, Belén Feliú e Xela Arias para "Album de Mulleres" da web www.culturagalega.org. Tamén é co-autora do estudo Muller e Medios de Comunicación. Imaxe e Protagonismo.

Creou e participou en distintos proxectos artísticos, entre eles O Son da Pedra (1994), de Milladoiro; Daquelas que cantan. Rosalía na palabra de once poetas galegas (1997). da Fundación Rosalía de Catro; Son Delas, coordinado por Uxía Senlle; O outro extremo do paraíso e Lob*s (1998), con Antón Lopo; Estalactitas (2002), con Anxos Romeo e Lupe Gómez; Catro poetas suicidas. Intervención poética contra a levidade (2002) en solitario; e A voz e o poema. Os periplos de Avilés de Taramancos (2003), con Anxo Quintela. Colabora  en publicacións literarias e de información xeral e participou en xornadas sobre temas de literatura, xénero e comunicación.