Mudou a miña vida profesional e mudou o goberno galego, ou viceversa.

Deixei a miña empresa de toda a vida –Igalia– e, polo tanto, tamén cesei coma presidente da Asociación de Empresas de Software Libre de Galicia (AGASOL). Todo para continuar afondando na natureza do subtítulo deste blog en ANT -”emprendedor TIC”-, agora nunha start-up de software libre en Zaragoza –eBox.

Mudei de traballo e de cidade, pero non mudou o meu compromiso co software libre e a crenza nel máis aló do tecnolóxico, coma un modelo de referencia válido para construír unha sociedade mellor, máis aberta, participativa e sostíbel, baseado o seu desenvolvemento no coñecemento e a colaboración.

No seu programa electoral, o PP de Galicia comprometíase a apostar pola utilización extensiva de software libre e estándares abertos, ademais de compartir e reutilizar o software pagado por todos os cidadáns:

[...] o PPdeG concentrará todas as competencias relacionadas co desenvolvemento das TICs nas administracións públicas galegas nunha única unidade administrativa, [...] encargada do impulso das seguintes accións de goberno:
–Impulso da implantación de software libre e uso de estándares abertos na Administración Autonómica, compartindo e reutilizando o software que fose creado con diñeiro público [...]

Confío en que reaproveiten o traballo feito polo goberno anterior, por exemplo o proxecto Reutiliz@, referencia máis que válida coma guía de publicación de información pública, para ser reutilizada e aproveitada por cidadáns, empresas e a propia administración.

Unha vez no goberno, o plan de acción ben podería comezar igual có Británico, do que cito somentes algunhas verbas do prólogo  [tradución libre dende o inglés]:

[...]

• Queremos compartir e reutilizar o que o contribuínte xa pagou nalgunha área da administración pública –non só para evitar pagar dúas veces, senón tamén para reducir riscos e dirixir solucións comúns e conxuntas cara ás necesidades tamén comúns do goberno.

• Queremos fomentar a innovación e os innovadores –dentro do Goberno, fomentando o pensamento open source, e fóra axudando a desenvolver un mercado vibrante.

• Queremos darlle o liderado á industria tecnolóxica e á economía para beneficiarse da información xerada e o software desenvolvido dentro do Goberno. [...]

Ben sabemos que as verbas as leva o vento, en Zaragoza o Cierzo e na Terra o do esquecemento, o do eterno pensamento curtopracista e a dificultade para mudar estruturas inútiles herdadas do pasado.

Seremos quen de mudar o noso modelo? Ou seguiremos esperando a que todo cambie para seguir igual?