Feixóo e o presidente da Deputaciónd de Pontevedra, Rafael Louzán, na Xunta Directiva do PPdeG. Manuel Vilas    1 / 3    

Alberto Núñez Feixóo xuntou este serán a toda a cúpula dos conservadores en Compostela para lanzarlles dúas mensaxes. Primeiro, que o novo Goberno Galego continuará coa renovación coa que logrou limitar o poder dos 'baróns' provinciais. E segundo, que o partido non pode ser o mesmo que a Xunta pois “máis que nunca Galicia necesita dun Goberno de unidade”.

Conselleiros que non votasen ao PP

Así o dixo presidente do PPdeG nunha ateigada Xunta Directiva organizada en Santiago. Nela, Feixóo insistiu que o seu novo executivo “non pode ser o goberno do PP, senón o goberno de todos”. Feixóo teima así no seu anuncio de nomear conselleiros independentes, non afiliados, mesmo persoas que non votasen aos 'populares' este 1M.

E é que o líder conservador aposta por un “goberno de unidade” para afrontar unha crise que non dubida en mostrar en toda a súa magnitude. “É imprescindíbel un Goberno de todos porque a sangría do desemprego afectará a un cuarto de millón de fogares galegos a final de ano”, advertiu.

Fixando o calendario para a marcha de Baltar

Ante os presidentes do partido en Ourense, A Coruña e Pontevedra (Baltar, Negreira e Louzán); o mandatario argumentou que a nova Xunta “non pode ser unha paréntese na renovación do partido”.

Renovación que Feixóo e o seu número dous, Alfonso Rueda, planean culminar nun Congreso a nivel galego que se celebrará o 9 e o 10 de Maio. Despois haberá conclaves provinciais e a intención do aparato do partido é que o de Ourense sirva para escenificar a marcha de Xosé Manuel Baltar, o presidente da Deputación, principal representante do 'sector da boina'.

Fin das ideoloxías en Galicia?

Feixóo xustificou o próximo cambio da cúpula dos conservadores e a chegada de independentes ao goberno nos resultados electorais. Así, indicou que o PP non logrou a maioría absoluta pola campaña, senón por mor da “renovación” do ideario nestes catro anos. Tamén indicou que o electorado xa non escolle entre dereitas e esquerdas ou entre nacionalistas e non nacionalistas. Feixóo asegura que os galegos votan en función dos partidos que ofertan “pasado ou futuro”.

Ademais, advertiu que a experiencia da derrota do bipartito mostra que os executivos que non cumpren coas súas promesas están destinados ao fracaso.