PUBLICIDADE
Mércores, 17 de marzo de 2010
Portada  |  CRITICA   RSS  |  Teatro   RSS
'Unha primavera para Aldara' de Teresa Moure
Sentimentalismo e artificio

Manuel Xestoso .  Teatro Atlántico leva a cabo unha ambiciosa montaxe dunha obra feble e previsíbel.

Reloxo 25.02.2009 | 17:36
TAGS: Teatro do Atlántico , Xulio Lago , Teresa Moure , Unha primavera para Aldara , ,

Unha primavera para Aldara 
Compañía: Teatro do Atlántico 
Dirección: Xulio Lago
Elenco: Amparo Malo, Lucía Regueiro, María Bouzas, María Barcala, Pilar Pereira, Marcos Correa, Belén Constenla, Josi Lage, Agustín Veiga, Xoán Carlos Mejuto.


Estamos nun convento medieval, en pleno levantamento irmandiño. Un cabaleiro da Irmandade chega ferido dunha batalla e pide asilo para repousar e sandar das súas mágoas. Logo de as monxas discutir sobre a conveniencia de agachar un home na freiría, prevalece a caridade cristiá. O soldado queda e, entre discusións sobre a xustiza da causa irmandiña e sobre os múltiples casos de violencia sobre as mulleres que teñen lugar neses “tempos convulsos”, o amor xorde entre o guerreiro e a abadesa. Hai truco, e resulta que o irmandiño non é un home senón unha muller travestida, un “espírito libre” que se rebela contra o papel subordinado que se lle atribúe ás do seu sexo. A abadesa xa o sabe e tanto lle ten: o amor “prohibido” triunfa sobre as miserábeis condicións que a época impón. 

Dados os múltiples anacronismos que concorren na trama de Unha primavera para Aldara, hai que ler esta peza como un símbolo animado por un espírito ben intencionado: o de trasladar á Idade Media problemas de actualidade –como son o da violencia de xénero ou o da independencia da muller– co obxectivo de manifestar un discurso de carácter progresista sobre eles, ao tempo que se propón unha lectura provocadora e subversiva da vida conventual, converténdoa –aínda que só sexa de xeito alegórico– nun espazo de liberdade conquistado por aquelas que o habitan. 

Mais a persecución dese obxectivo provoca que a autora esqueza as súas criaturas: os personaxes da obra carecen de voz propia, converténdose en meros altofalantes da tese que se lle quere espetar ao público. Non hai verdadeiros caracteres, senón marionetas que se comportan exclusivamente consonte a visión do mundo que se nos quere transmitir. Unha vez recoñecida a “mensaxe”, xa non queda ningunha posibilidade de sorpresa, discorrendo todo polo camiño da previsibilidade e da redundancia. O único que rompe a monotonía –e non necesariamente para ben– e o sentimentalismo no que se cae na descrición das relacións amorosas entre a abadesa e aguerrida irmandiña. 

No seu tramo final, a obra inclúe dous enviados do bispo, que investigan os feitos que tiveron lugar no convento: a grotesca versión que se dá destes dous personaxes constitúe a mellor proba de que non se quere construír un conflito dramático, senón ilustrar unha teoría –moi politicamente correcta, iso si.

Se sempre se lamenta que ocorran estas cousas, esta vez a mágoa é dupla, porque a montaxe de Unha primavera para Aldara é realmente ambiciosa. Teatro do Atlántico segue a demostrar que é unha das compañías máis competentes deste país e Xulio Lago, un dos mellores directores que temos. O coidado da dramaturxia, o preciosismo plástico da posta en escena e a excelente interpretación de todas as actrices logra que, por momentos, esquezamos o artificial que resulta o texto. Lucía Regueiro destaca sobre todas elas –quizais porque o seu personaxe é o máis alleo á vocación editorializante da obra–, mais paga a pena asistir a esta función só por ver ese estupendo labor de director e elenco. Os aplausos e os comentarios positivos que se escoitan a saída son mérito exclusivamente de seu.

COMPARTIR Envía a Chuza Envía a Facebook Envía a Menéame Envía a del.icio.us Envía a Digg Envía a Google Bookmark Envía a Yahoo My Web Envía a Technorati Envía a Barrapunto Envía a Domelhor
Imprimir     Tamano Menos Tamano Mas
VOTA
A Nosa Terra Diario eliminará todos aqueles comentarios que conteñan vocabulario ofensivo ou publicitario ou que non se axusten ao tema desta información. Grazas pola súa participaciún.
 
Esquerda 1/1 Dereita
© 2010 A Nosa Terra
Principe 22 - Baixo. 36202 Vigo
Tel. 986 22 24 05.

info@anosaterra.com
diariodixital@anosaterra.com
Delegación Santiago
Tel. 620 91 70 56

Publicidade:
Tel. 616 90 46 88
Tel. 986 43 38 30
publicidade@anosaterra.com
PDF  Descargar Tarifas
Edita: Promocións Culturais Galegas S.A.
Vicepresidente e Conselleiro-delegado:
Afonso Eíré López

Director: Manuel Veiga Taboada
Subdirector: Xan Carballa Alonso
Coordenador Dixital: César Lorenzo Gil
Edición: María Obelleiro Hermida
Charina Giráldez Río
Premio EGANET 2008 - Web Comunicación Empresarial
Valid XHTML 1.0 Transitional Valid CSS!
Pedro Figueras Comunicación Opsou