1 / 5    

Con campañas propias e apoiando e reforzando o traballo dos seus respectivos partidos, as agrupacións xuvenís teñen moito que dicir na carreira electoral. Saben que o voto da mocidade é importante, por iso concentran boa parte do seu esforzo en achegar aos máis novos a visión que cada partido ten para este sector da poboación con dereito a voto.

Visitas a campus, lugares de ocio, mercadiños, actos específicos para os máis novos e moito merchandising centran a estratexia de Novas Xeracións, Galiza Nova e Xuventudes Socialistas nesta campaña que está a piques de rematar.

PSdeG

“Queremos que a xente vote e que os mozos e mozas sexan conscientes da importancia que teñen estas eleccións e de que cada voto importa”, explica María Dolores Rodríguez, secretaria xeral das Xuventudes Socialistas do PSdeG. A socialista comenta que a aportación da sección moza dos socialistas galegos está a desenvolver a súa propia campaña electoral “coordinada coa do propio partido”.

Baixo o lema 'Queres que volvan?' e cun cartel no que aparece Manuel Fraga como ventrílocuo manexando ao actual candidato do PPdeG, Alberte Núñez Feixóo, a campaña dos mozos socialistas está a ser moi comentada. “A idea naceu en Xuventudes Socialistas e materializouna unha axencia publicitaria”, comenta a secretaria xeral, que explica que “unha imaxe vale máis que mil palabras”. A mocidade do partido socialista resume con esta imaxe a súa proposta política. “Nós aportamos outra visión distinta á dos que gobernaron durante 16 anos a Xunta de Galicia. O PSdeG é estabilidade e confianza, cambio e evolución”, resume María Dolores Rodríguez, que explica que o seu grupo participou na redacción do programa electoral en materia especificamente xuvenil e e en áreas como a de vivenda, emprego e educación.

Novas Xeracións

Pola súa banda, María Seoane, presidenta da Novas Xeracións do PPdeG, explica que estes días a súa axenda e a dos seus colaboradores está “moi apertada”. Polas mañás, fai campaña propia coa súa caravana en campus universitarios, centros de formación e lugares frecuentados pola mocidade, e polas tardes van aos mitins e actos electorais de Feixóo.

“Estamos facendo unha campaña propia achegando as propostas de Feixóo que afectan directamente á xuventude aos máis novos. Sabemos que o tema da vivenda e o emprego preocupan aos mozos e mozas galegos porque nolo comentan cando repartimos propaganda”, explica a presidenta de Novas Xeracións, que explica que as súas accións están a ter “moi boa recepción” entre os máis novos, sobre todo, puntualiza, “na franxa de idade que vai dos 18 aos 23 anos”.

Galiza Nova

A secretaria xeral de Galiza Nova, Iria Aboi, recoñece que o traballo de campaña ven de meses atrás. “En Galiza Nova empezamos a campaña meses atrás coa elaboración do programa electoral na área xuvenil e en áreas transversais que afectan á mocidade. Fixemos unha serie de propostas que a dirección do BNG incorporou ao seu programa”, comenta.

Aboi, que admite que o voto xuvenil é “decisivo” explica que Galiza Nova ten unha estratexia electoral propia que empezou cunha campaña do voto por correo para facilitar o sufraxio entre os mozos “sabendo que as eleccións coinciden cos exames e que moita xente nova está fora de Galiza”.

Agora a campaña de Galiza Nova, 'A forza que Galiza precisa' cunha temática que recorda a lenda de Escalibur, complementa á do BNG, achegando os “logros” do BNG nos últimos catro anos nas distintas consellarías e especificando as cuestións de mocidade para a próxima lexislatura ao público xuvenil. “Facemos actos propios e abertos e estamos a notar moi boa acollida entre a xente nova, que tradicionalmente apostou sempre polo nacionalismo”.