Despois de que Rego lembrase que Fraga se gastou "30 millóns en Monte Pío", o popular indicou que Touriño "vive alí", e denunciou que na residencia oficial se "fixeron 'festorros'", e "seguro que non con música galega", apostilou dirixíndose a Aymerich. Fronte a esta acusación, Rego negou a afirmación e asegurou que o presidente utiliza as instalacións con fins institucionais.

Ademais, Rego espetoulle a Ruíz Rivas que "para sobrevivir nas listas non fai falta chegar tan lonxe", en relación á renovación no PP e á caída das listas de persoas "da facción" de Fraga, e lamentou que o popular faga "bazofia política" e responda a unha estratexia de "mentiras e manipulación".

O portavoz do Grupo Popular expuxo, pola súa banda, as contas do "malgasto" realizado nesta lexislatura polo Goberno presidido por Touriño, entre os que destacou "os 93 asesores contratados, os 2,2 millóns de euros das reformas do despacho, os alugueres de edificios ou as obras de tres salas en San Caetano".

Así, ironizou con que os cristais que se instalarán "cambian de cor" e coa instalación dun estanque "para entrar con tranquilidade nesas reunións do Consello da Xunta". Censurou estas obras e lamentou que, pola contra, non se construíra "o edificio para o 112 ou o Palacio de Xustiza".

"Vostedes esquécense dos 240.000 euros no paraíso fiscal", espetoulle Aymerich en relación á suposta falta de pagamento de Luís Carrera e tachou de "denuncias oportunistas" as do PP, aos que remitiu a un debate electoral para abordar todos os asuntos.

Aymerich ironizou coa ausencia na deputación do 'número un' do PPdeG pola Coruña, Carlos Negreira, que lembrou era o "delegado de Feixóo en Portos de Galicia" cando gobernaban os populares, entidade investigada pola Fiscalía, polo que Aymerich concluíu que "Pedro Arias (número dous pola provincia) estará contento co ascenso que se aveciña".Tamén se referiu Rego a esta cuestión e lembrou que Pablo Crespo tamén formaba parte deste ente.

"Benditos problemas", ironizou o deputado nacionalista en comparación co "temporal" do PP e para recalcar que o partido da oposición "non practica o que predica". En todo caso, avogou por aplicar a "transparencia" e invitou a mostrar os gastos das obras e a levar aos xornalistas como testemuñas dos traballos que se realizan en San Caetano.

Pola súa banda, Ismael Rego culpou o PP dunha estratexia "de mentira e manipulación" e sacou a colación "30 audis adquiridos por Fraga ou o investimento de 450 millóns de euros na Cidade da Cultura para beneficiar aos cuñados de Raxoi". Ruiz Rivas concluíu que Touriño supera ao presidente dos Estados Unidos, Barack Obama, en gastos; mentres que Rego replicoulle instándolle a comparalos cos de "Aguirre ou Gallardón", que superan os do mandatario galego.

No canto a Sogama, o deputado do PPdeG fixo fincapé en que "hai once cargos imputados" por supostas "graves" irregularidades de tipo ambiental e denunciou que "nin o conselleiro nin o presidente de Sogama comparecesen" para explicar as verteduras.

Deste xeito, Ruiz Rivas indicou que o "trato de favor" recibido da actual Xunta por Danigal e o feito de que esta empresa "pasase a mans dunha sociedade de capital risco" que "non está controlada por persoa física ou xurídica" fai necesario que "Touriño explique" a xestión da empresa.

Ana Pontón criticou que o PP "non cuestione o que fixo" á fronte da sociedade e recalcou que o BNG pide "a descentralización" dun servizo que "o PP impuxo aos concellos" e considerou que "a Xunta debe elaborar un expediente sancionador".

Rego, que avisou de que "os galegos non lle van seguir (ao PP) por ese camiño" e os colocará no seu sitio (o 1 de marzo), destacou que o actual Goberno iniciou o cambio de xestión de Sogama pero que "en catro anos non puido acabar cos 16 do PP".