Ramón Soto. Paco Vilabarros

A morte senta ben?

Nunca.

Que lle inspira?

De entrada respecto, e por traballar no que traballo, moitas veces, afán de superación. Cando unha persoa morre non perde os seus dereitos, ao contrario. Eu administro ese último dereito de que o corpo do finado sexa tratado do mellor xeito posíbel.

Vostede estudou Filosofía. Filosofa no choio?

Un tanatorio é un lugar onde se viven os momentos máis tráxicos do ser humano.

É duro?

É, porque tratas coa morte e a dor a diario. Temos que facer coma os médicos, non implicarnos para non vernos afectados. O meu cometido é ofrecerlles ás familias seguridade e darlles a confianza plena de que o seu ser querido vai quedar natural.

Canto tempo tarda en preparar un defunto?

Normalmente entre 40 e 60 minutos. Dependendo do estado no que reciba o corpo podo chegar a tardar entre 4 e 5 horas si teño que facer algún tipo de reconstrución.

13 anos dan para moitos cambios, non?

Ao principio chegabas ás casas e dicíanche como tiñas que facer o teu traballo. Cos tanatorios é todo máis profesional, instrumental e aséptico.

É un traballo agradecido?

Normalmente os familiares agradecen o traballo que facemos ao ver o antes e o despois do finado. Creo que psicoloxicamente é san que miren ao morto.

Por que?

Para elaborar un dó. Hai xente que si non ve ao seu morto pode chegar a pensar: “marchou sen que puidera miralo”.

Quen son máis agradecidos os mortos ou os vivos?

(Silencio) Os mortos non poden ser agradecidos pola súa condición. Pero eu sei que lles fago o que eles querían que lles fixese.

Apálpase a crise nos tanatorios?

A xente morre igual, é certo. Pero moitos deciden recortar gastos ao elixir cadaleito.

Aprendeu algo dos finados?

A sala de tanatopraxe é o sitio máis democrático do mundo. En horizontal todos somos iguais.

Utiliza produtos de maquillaxe específicos?

Non. Agora ben, canto máis cara sexa a maquillaxe mellor. Usamos produtos químicos específicos para lavar, desinfectar e conservar os corpos.

O de “antes muerta que sencilla” vale incluso despois de palmar, non si?

Os defuntos non poden ir de calquera maneira. O rito da morte fainos máis humanos.

Cre no outro mundo?

Non o sei nin teño xeito de sabelo.

Recomendaríalle a outras persoas que se adicasen á tanatopraxe?

Nin si nin non. Isto non é unha vocación, é unha profesión.