Sinatura do acordo de colaboración entre o ICO e o Igape. Ana Varela

Así o avanzaron o presidente do ICO, Aurelio Martínez, e o titular da Xunta, Emilio Pérez Touriño, tras a sinatura do convenio subscrito entre ambas as dúas entidades, o cuarto na presente lexislatura.

Esta actuación enmárcase no Plan Xeral de Fomento Empresarial do ICO, que prevé poñer a disposición do tecido produtivo 10.900 millóns de euros e, á súa vez, integra a liña Icopeme, dotada de 10.000 millóns.

O seu obxectivo é que as pequenas e medianas empresas (pemes) asuman o 60 por cento do investimento, mentres que a entidade estatal cubrirá a porcentaxe restante co fin de achegar liquidez para satisfacer as necesidades derivadas da adquisición de bens de equipo e outras operacións.

Segundo manifestou o presidente galego, a finalidade é "lograr alcanzar os 500 millóns de euros de capitalización de recursos" a través do conxunto de iniciativas de fomento empresarial. Neste sentido, destacou que en 2008 o Goberno galego captou "case o 5 por cento" do financiamento do ICO.

Pérez Touriño subliñou que a Xunta, a través do Igape, se "adiantou" ao impulsar en setembro de 2008 unha liña de avais de até 500 millóns de euros dirixida a achegar liquidez ás 22 entidades financeiras que operan en Galicia. Esta liña, como asegurou, está a ter resultados que se apreciarán entre decembro e xaneiro.

Outros 1.000 millóns en reserva

Pola súa banda, o responsábel do ICO apuntou que de esgotárense os fondos previstos por ambas as dúas liñas de liquidez, estatal e galega, se mobilizarían 1.000 millóns de euros, un importe que cualificou de "moi respectábel". Ademais, destacou que en breve se ampliará o montante total, cunha terceira disposición da entidade estatal.

O presidente galego avanzou ademais que no consello da Xunta de hoxe ou da próxima semana se aprobará a liña de 100 millóns de euros en axudas directas para pemes e o reforzo dos avais que pretenden capitalizar as sociedades de garantía recíproca. Pérez Touriño recordou que o compromiso do Goberno galego en 2009 é mobilizar en todo o exercicio ao redor de 2.000 millóns de euros.