Libros para a bañeira    1 / 3    

Coches que transportan contos, libros que triscan, historias que nadan, crebacabezas, relatos agochados tras as portas, páxinas que se desmontan, texturas, formas... O universo dos Bolechas, creado por Pepe Carreiro e editado por A Nosa Terra, é cada vez maior.

Ademais de inicialos na lingua e na lectura, os materiais das novidades que os Bolechas traen para os máis cativos tamén os introducen na psicomotricidade. Os máis pequechos da familia xa poden aprender da man dos Bolechas.

Os novos contos convertidos en xoguetes da editorial A Nosa Terra están dirixidos á franxa de idade que vai dos 0 aos 4 anos. Estes libros disfrazados de xogo veñen cubrir un oco de mercado no que practicamente non existía o galego.

Libros para xogar

Desta vez, os personaxes creados por Pepe Carreiro adoptan multitude de formas e vístense con orixinais materiais para que os nenos comecen a diferenciar as figuras. Coa colección adicada aos cativos, aprender o nome das crías dos animais, os sons que emiten, saber que tempo vai e aprender o nome da roupa e das tendas resulta divertido.

Entre goma-escuma, libros somerxíbeis, e diferentes texturas, tamén saberán da importancia da hixiene e da reciclaxe. Os Bolechas fan máis doado ensinarlles os números, as cores e as figuras xeométricas.

• Libros que triscan. Quen anda aí? e Quen son eu? son os títulos que forman parte desta colección. Os bebés de 0 a 3 anos poden engurrar e apertar uns libros de tea que sempre adoptan a súa forma orixinal. Mentres aprenden os sons que emiten os Bolechas convertidos en animais e descobren os parentescos, poden divertirse facendo triscar as páxinas dos libros.
• Crebacabezas. Permítenlle aos maiores de tres anos compoñer bloques de construción para coñecer o nome e os gustos de cada un dos Bolechas.
• Coches libros. Os vehículos preferidos dos nenos son dirixidos polos Bolechas. Ademais de transportar a Pili, a Loli, a Sonia, a Braulio, a Carlos, a Tatá e a Chispa, o camión do lixo, o dos bombeiros, a ambulancia e o coche da policía cargan historias didácticas para os nenos de 3 a 4 anos.
• Libros con sorpresa. Os cativos de 0 a 3 anos poden aprender o nome das prendas de roupa, das tendas, das crías de animais e do tempo cando abren e pechan as portas das páxinas dos catro libros que compoñen esta colección.
• Libros para a bañeira. Carlos na praia, Pili no delfinario, Braulio na piscina, Sonia na lancha e Chispa na tina son libros moles plastificados para somerxer na bañeira. Cada un dos relatos inclúe a figura de cadanseu protagonista en relevo.
• Libros de goma-escuma. A miña caixa de ferramentas trátase da primeira aproximación dos nenos no eido da bricolaxe. En O mar os cativos poden descubrir o nome de especies mariñas recubertas de distintas texturas. Tatá conta os peixes introduce os nenos na contaxe dos números e na distinción das cores. En As formas cada un dos debuxos inclúe os moldes de corazóns, estrelas e outras figuras xeométricas. Os catro libros están destinados aos cativos de 1 a 4 anos, pódense introducir na auga e mesmo permiten desmontar e volver montar os obxectos de cada páxina.