Protestas en Gaza D'Escoto tomou a decisión tras recibir unha solicitude do Movemento dos Países Non Aliñados (MNOAL) para que a Asemblea Xeral sume a súa voz á do Consello de Seguridade da ONU na esixencia dun cesamento do fogo en Gaza. Os Países Non Aliñados sinalan nunha declaración enviada ao presidente da Asemblea que "o organismo máis democrático e representativo de Nacións Unidas ten o deber de dar debida resposta ás preocupacións da comunidade internacional en relación á crise na Franxa de Gaza".

"O MNOAL condena nos termos máis enérxicos o aberto desprezo por parte de Israel da resolución 1.860 do Consello de Seguridade, adoptada o 8 de xaneiro de 2009, que esixe o inmediato cesamento do fogo", asegura a declaración. Considera ademais que a "brutal agresión israelí contra a poboación civil palestina na franxa de Gaza constitúe unha grave violación do dereito internacional, incluído o dereito humanitario e o relativo aos dereitos humanos".

Por iso, esixe a retirada das tropas israelís e a toma de medidas para responder ás necesidades humanitarias da poboación palestina tras 18 días de conflito. É a segunda ocasión en menos dunha semana en que o presidente da Asemblea Xeral convoca a unha reunión para debater a situación en Gaza.

A anterior, convocada con carácter de urxencia o pasado 8 de xaneiro, foi posposta por D'Escoto despois de que o Consello de Seguridade alcanzase un acordo para chamar a un cesamento inmediato das hostilidades.

A ofensiva lanzada o pasado 27 de decembro polo Exército hebreo contra o movemento islamita Hamás causou ao redor de 920 mortos e 4.100 feridos palestinos, segundo os responsábeis de sanidade palestinos.