Ban Ki-moon, secretario xeral das Nacións Unidas. Mark Garten/UN PHOTO

Nunha mensaxe clara e directa na que pediu o fin da ofensiva que comezou o pasado 27 de decembro na Franxa de Gaza, Ban Ki Moon espetou, "a guerra debe finalizar". "Dígolles a ambas as partes que paren xa. Morreu demasiada xente. houbo moito sufrimento do pobo civil. Moitas persoas viven diariamente con medo a morrer. E en Gaza a sociedade estase destruíndo: as casas dos cidadáns, as infraestruturas, os centros médicos e as escolas", lamentou.

"O meu obxectivo é incrementar a acción diplomática conxunta e asegurar que a asistencia humanitaria urxente chega a aqueles que máis a necesitan", manifestou o máximo responsábel de Nacións Unidas nunha rolda de prensa. "Este é un tema que hai que tratar cos líderes mundiais, xa que levo desde o principio intentando resolver a crise. E esa é outra cousa que hai que ter presente", agregou.

Consello de Seguridade

O diplomático nomeou as condicións necesarias para que se cumpra a resolución do Consello de Seguridade, acordada a semana pasada e que pide o cesamento do fogo inmediato. Iso leva o fin das operacións militares en Gaza, o fin da ofensiva militar en Israel e do lanzamento de foguetes por parte de milicianos de Hamas. Ademais, débese facilitar a chegada de axuda internacional, acabar co contrabando de armas a Gaza, e reabrir os pasos fronteirizos.

Territorio ocupado

"Os civís inocentes, tanto do territorio ocupado como do sur de Israel non poden vivir no estado do medo ou baixo asedio. Hai que deixar paso á vida normal. Esa é a única forma de que se impoña a paz", agregou Ban no seu discurso. Máis de 900 palestinos morreron desde que comezou a ofensiva na zona e uns 4.000 resultaron feridos. Pola súa banda, trece israelís, dez deles soldados, morreron en ataques dos milicianos.