Giana Gomes no xulgado. Ceivar

"Os dous están condenados a tres anos de prisión por "danos terroristas con finalidade de subverter a orde constitucional", amais de inhabilitación absoluta por nove anos". Como autores dun delito de furto de uso de vehículo, impúxoselles unha multa de nove meses e un día cunha cota de 6 euros diarios.

A Ugio Caamanho engádeselle un delito de falsidade de documentos oficiais, polo que a pena aumenta 1 ano, 9 meses e un día de prisión, e unha multa de 6 meses e 1 día cunha cota de 6 euros diarios. Por outra banda, vánselles cobrar os custos de xuízo e unha idemnización a Caixa Galicia e a outros particulares. Así as cousas, Giana xa pasou no cárcere tres meses máis dos que lle impón a condena, e a Ugio Caamanho, condenado a un total de 4 anos e 9 meses de prisión, aínda lle quedaría ano e medio por diante.

"Con todo, imos falar coa avogada, porque seica cando tes a metade da condena cumprida podes pór un recurso no Tribunal Supremo para saír en liberdade", explica Joam Peres. Ugio Caamanho leva xa dous terzos da condena, e actualmente está na prisión de Valdemoro para ser trasladado de volta a Puerto de Santa María (Cádiz). O colectivo Ceivar segue a organizar mobilizacións e actividades de denuncia: tamén van presentar denuncia pola agresión que tería sofrido Giana Gómes a mans dun axente da Garda Civil, antes da segunda vista do xuízo. Segundo a denuncia Gomes foi lanzada contra unha parede e a consecuencia diso recibiu un forte golpe na cabeza.

Pero o día de hoxe, Giana xa está de volta na casa. "Ceibárona onte ás 21.00, e hoxe ás 8.00 fíxoselle un recibimento na Praia do Tombo do Gato, en Vigo, ao lado de Samil". Para esta tarde está previsto outro recibimento no local social A Revolta, tamén en Vigo.