Barack Obama, presidente dos EE UU. Shannon Stapleton/Reuters    1 / 3    

O demócrata será investido como o presidente estadounidense número 44 o 20 de xaneiro do 2009 e será entón cando se vexa na obriga de enfrontarse a varios desafíos, incluíndo paliar a crise económica, finalizar a guerra no Iraq e cumprir co seu compromiso de reformar o sistema de saúde.

Os Estados de Ohio, onde George W. Bush gañara por unha leve diferenza na reelección do 2004, e Virginia, que non votara por un demócrata desde 1964, foron cruciais para darlle a vitoria a Obama, que ampliou as maiorías dos demócratas en ambas as cámaras do Congreso.

Ampla vitoria

Até as 5.00 horas ninguén se atrevía a dar o nome dun gañador seguro. Foi entón cando saíron os resultados parciais que xa proclamaban vencedor a Obama, ao obter os 270 votos necesarios para conseguir que o Colexio Electoral o designase presidente. Unha hora máis tarde, a falta dos datos concluíntes dalgúns Estados do litoral oeste, o demócrata sumaba xa 342 votos, fronte aos 143 de John McCain. Non se lograba unha vitoria tan ampla desde o 1996, cando Bill Clinton derrotaba a Bob Dole por 379 votos fronte aos 159 do seu rival republicano.

Estados decisivos

Florida, que dá 27 votos, Pensilvania, con 21, Ohio, que fornece 20, e California, que dá 55 votos, foron os Estados que lle deron a vitoria ao demócrata, que tamén gañou en Florida, que ten 13 votos. Maine, Vermont, Massachusetts, Connecticut, Delaware, Maryland, New Hampshire, Nova Jersey, Nova York, Illinois, de onde é senador, e o distrito de Columbia, que lle dá abeiro á capital do país, Washington, tamén foron claves para erixir a Obama presidente dos EE UU.

Pola súa banda, o McCain tiña os ollos postos nos Estados do sur, en Tennessee, Alabama, Arkansas, Carolina do Sur, Pensilvania e Ohio.

Reacción de Obama

Barack Obama festexaba o seu triunfo en Chicago, onde lles dixo aos seus seguidos que "o cambio chegou aos Estados Unidos" e onde felicitou a John McCain pola dura campaña electoral que sacara adiante. "Transcorreu moito tempo, pero esta noite, grazas ao que fixemos este día, neste elección, neste momento de definicións, o cambio chegou aos Estados Unidos", engadía ante a multitude de 70.000 persoas.

No seu discurso, Obama non esqueceu a súa familia, "A miña familia fíxome quen son. Bótoos en falta esta noite. Sei que a miña débesa con eles é inmensurábel", dicía Obama, que perdeu o luns a súa avoa e no 1995, a súa nai. Así, agradecía temén os esforzos da súa muller e das súas fillas, que non se quixeron perder a noite electoral.

"Nunca fun o omáis probábel candidato para este cargo. Non comezamos nin con moitos cartos, nin con maiores apoios", engadía Obama. "Se hai alguén aí que aínda dubida que os EE UU é un lugar no que todo é posíbel, que aínda se pregunta se o soño americano dos nosos fundadores está vivo neste tempo, que aínda cuestiona o poder da nosa democracia, esta noite é a súa resposta".

O demócrata facía fincapé nos desafíos que afrontará como presidente dos EE UU: "celelbramos esta noite, pero sabemos que os desafíos que o futuro traerá son os maiores da nosa era: dúas guerras, un planeta en perigo, a peor crise financeira do século". Tamén tivo palabras de lembranza para os soldados estadounidenses no Iraq e en Afganistán. Neste sentido, prometeu a retirada do Iraq en 16 meses.

"Hai novos traballos para crear, novas escolas para construír, amezas que conter, alianzas que reparar". "Pode ser que non cheguemos nun ano, ou nun período de Goberno", pero os EE UU podererán afrontalo, dicía. "Yes, we can!", respondíanlle os seus seguidores.

McCain recoñece a súa derrota

O candidato republicano, John McCain, recoñecía a vitoria do seu rival nunha intervención en Phoenix, Arizona. "O pobo estadounidense falou. Chamei o senador Obama para felicitalo tras ser elixido presidente deste país", apuntaba. Ademais, engadía que a elección do demócrata representa "un grande avance para os Estados Unidos" e é "unha proba de que temos superado o racismo".

Acompañado da súa esposa e da candidata republicana á vicepresidencia, Sarah Palin, McCain dicía que "é natural que nos sintamos hoxe un pouco defraudados, pero mañá debemos superalo". "O fallo foi meu, non de vostedes", sinalaba. "Non sei que poderíamos ter feito para gañar esta eleccións". "Esta campaña era e será a grande honra da miña vida", agregaba.

"Espero que Deus inspire o meu antigo opoñente e futuro presidente", concluía perante os miles de republicanos.

Unha noite para a historia

Horas antes de que os datos confirmasen vitoria de Obama, milleiros de afroamericanos saíron ás rúas para celebrar por anticipado o triunfo do demócrata nas eleccións presidenciais. Eses milleiros de norteamericanos seguían as eleccións desde unha pantalla xigante colocada na praza de Estafes Square en Nova York, e preto de 2.000 persoas tamén seguían o histórico acontecemento desde o barrio de Harlem, en Nova York, demostrando así a capacidade de convocatoria de Obama.

Nese sentido, decenas de milleiros de seguidores levaban esperando varias horas o candidato demócrata no Grant Park de Chicago, cidade na que deu o seu discurso o presidente dos EE UU.

A pesar de que só suman o 13 por cento da poboación estadounidense, máis do 90 por cento dos americanos negros manifestaron a súa intención de votar a favor do senador por Illinois nas eleccións. "Definitivamente, estamos facendo historia", aseguraba Sheneka Mayes, unha profesora de ensino elemental en Atlanta. "Esta noite quedará gardada na miña memoria e na dos meus fillos".