Corina Porro, presidenta da Autoridade Portuaria de Vigo

Foi alcaldesa de Vigo, a primeira conselleira galega de Servizos Sociais, deputada e agora exerce como senadora e vicepresidenta da Deputación de Pontevedra.

Como está condicionando a crise económica a vida política, non xa no estado, tamén no terreo municipal?

A crise ocúpao todo. É certo que é internacional e que se vive de maneira diferente en cada país. Pero o incremento do paro ou da inflación é en España é o máis intenso de Europa, e iso demostra que podes enfrontar o problema mellor ou peor. Os gobernos poden intervir para paliar as crises e tamén as administracións locais. Por exemplo acelerando a posta a disposición de solo, como vivimos en Vigo. Nós puxémonos a traballar, porque hai que deixar de lado os intereses de partido e sumar. Púxenlle ao alcalde de Vigo, vinte e cinco medidas, que empezaban por algunhas de apretar o cinto, de aforro enerxético, axudas ás pequenas e medianas empresas, medidas sociais de incremento de becas para uso de comedores escolares, recorte de gastos de publicidade e que se conxelasen as ordenanzas municipais, o que supuña unha media de aforro de 100 euros anuais a cada familia viguesa. E tendinlle a man cunha declaración pública para que esa estratexia tivese efectividade nos orzamentos do ano 2009. A súa resposta foi: “Corina, chega tarde”. Nin  sentou a dialogar nin fixo un xesto de aproximación. É unha irresponsabilidade non abrir canles de diálogo con todos os axentes sociais e tamén coa oposición, que temos a máis numerosa representación cidadá.

O desenvolvemento do plano de ordenación urbana pode ser un motor económico?

No programa electoral de Abel Caballero estaba o compromiso de 6.000 vivendas sociais, e no plano que eu consensuara con todos, e que el non quixo aprobar, había un horizonte de 36.000 vivendas sociais, tendo en conta que xa hai hoxe 7.000 peticións. Dun plano viábel pasou a outro imposíbel, e onde estaba compensada a edificabilidade descompensouse, pero non nas zonas poderosas senón onde afectaba sobre todo á xente que tiña unha pequena leira herdada ou no rural, que son ámbitos onde non se vai desenvolver o plan. En todo caso, nas medidas que lle propuxemos estaba a axilización do que tivese que ver con  obras de infraestruturas para paliar o paro que se produce na construción e xa vemos como van as cousas nos orzamentos xerais do estado. No AVE directo a Vigo, de 2008 a 2011, só temos proxectos e  cara o 2012 non hai nada consignado. Iso significa que non chegará por Cerdedo porque nin para o 2012 estarán comezadas as obras. Se en vez de proxectos e anuncios vivísemos obra real aínda podería paliarse a crise, pero este alcalde non ten peso político nin entre os seus.

O PP nas cidades e a lei electoral

Vigo, con Ourense, é a última gran cidade galega gobernada polo PP. Non lles está saíndo moi caro o déficit de poder nos grandes núcleos urbanos?

Evidentemente, pero agora o reto inmediato é recuperar o goberno na Xunta. Daquela comprobaremos como nos afecta. É moi importante gobernar  nas grandes cidades porque, como municipalista que son, sei que é onde se fai política máis perto da xente.

Aínda que agora non se use aquela distinción de boinas e birretes, parece que dentro do PPdeG  hai dúas maneiras diferentes de entender a política nas cidades grandes e nos núcleos máis pequenos.

Socioloxicamente Galiza cambiou. A xente nova do interior marchou para as cidades. A provincia de Ourense en conxunto ten os mesmos habitantes ca Vigo, e iso é unha realidade. O peso maioritario poboacional está nas cidades e iso quere dicir que as cousas se ven de maneira diferente. Vigo é unha cidade industrial co reto de seguir sendo motor económico de Galiza e probabelmente teña que ter estratexias políticas diferentes que Coruña. O perfil é distinto en cada lugar pero a mensaxe debe servirnos a todos.

Pero sendo a maior forza política quedanse ás portas do poder e reclaman cambios na lei electoral. Por que non teñen capacidade de interlocución con outras forzas?

É urxente cambiar a lei electoral porque non é democrática. Hoxe goberna Vigo unha forza con catro concellais menos ca o PP...

Se suma os do PSOE e o BNG son máis.

Pois daquela que se presenten xuntos. Pero non o fan porque se levan a matar.

As coalicións son democráticas.

Son legais pero,  ¿é democrático que goberne o BNG con catro concelleiros e o PP con trece non? É iso o que quixeron os cidadáns? A lei electoral é antidemocrática e non ten parangón en ningún país europeo.

Ese cambio na lei considera que debe ser para todo tipo de eleccións?

Por suposto, porque é inxusta en todos os niveis. E non é unha idea persoal porque Mariano Raxoi dío continuamente. En todo caso, demostrei que teño capacidade de diálogo político, porque mesmo asumín un PXOU do que o meu partido non elaborara unha liña. Tocoume a parte de exposición pública e asumín un plano xeral que era do BNG, porque era bo para Vigo e a súa cidadanía. Se puden chegar a entendementos o que lle achaco ao BNG é a covardía por non ter suficiente independencia para antepoñer ás súas ideas e o progreso da cidade de Vigo, ao uso do poder.

Fala vostede do poder en termos negativos, cando é o seu desideratum como forza política.

Aspiro a gobernar, porque o poder ten que estar no pobo e como política debes saber como utilizar esa forza que o pobo che dá. Son cousas diferentes.

Agora a Deputación parece moito máis presente en Vigo que en tempos anteriores.

A realidade electoral é que quedei apenas a 1.000 votos de acadar a maioría absoluta e a mensaxe que recibín é que o proxecto que tiña en marcha gostaba a moitos cidadáns, non só aos militantes do PP. Pense que deixei unha acta de deputada e a consellería para vir á oposición de Vigo, porque eran tempos de Prestige e guerra, e fíxeno porque creia na forza da cidade e me compensaba politicamente. Foron tres anos de satisfaccións e entregueille ao alcalde un superávit nas contas. Agora tiven a oportunidade da vicepresidencia da Deputación e teño presenza nun edificio vigués que xa fora decidido antes de chegar eu a este cargo, porque os cidadáns de Vigo teñen que poder facer todos os trámites administrativos sen desprazarse a Pontevedra. E ademais empezan a coñecerse mellor as ofertas sociais e culturais da Deputación.