Laura Sánchez Piñón, conselleira de Educación. AGN En rolda de prensa, a titular de Educación resaltou o "esforzo importante e singular" do Goberno galego na situación de crise económica actual e puntualizou que co plan de financiamento universitario vixente o incremento ascendería ao 0,46 por cento, con 387 millóns.

Así, ratificou o anuncio realizado polo propio presidente da Xunta, Emilio Pérez Touriño, que xa adiantara un financiamento adicional para as universidades galegas no 2009. "Non se reducirá nada e, por encima, crecerá. Esta é a situación real", reiterou. Sánchez Piñón garantiu tamén o mantemento do financiamento incondicionado e recordou os 11 millóns adicionais apuntados por Touriño, co que o investimento aumentará máis dun catro por cento. "Comparado con outras comunidades é superior", dixo e agregou que "Galiza aposta claramente polas universidades".

"En ningún momento se pode pór en dúbida o esforzo polo sistema universitario", manifestou a titular de Educación, á vez que recalcou que "nun momento de austeridade" a Xunta "garante o financiamento e capacidade investigadora das tres universidades".

Revisar o modelo

A conselleira ratificou o compromiso de Touriño de revisar no primeiro semestre do próximo ano o modelo de financiamento universitario en Galiza. "O compromiso é reformar o plan no primeiro semestre de 2009 e está nos orzamentos do próximo anos. É un compromiso firme", apostilou.

Neste sentido, xustificou o atraso da revisión coa situación de crise. "No momento que estea resolta poderemos abordar novos obxectivos", sentenciou.

Con todo, a titular de Educación realizou un chamamento á "responsabilidade institucional de todas as partes". Sobre a posición dos reitores, que demandaban máis recursos e a revisión do modelo canto antes, Sánchez Piñón considerou que "os tres mostran esa responsabilidade". "Son conscientes da situación", afirmou e mostrouse "absolutamente convencida de que os tres reitores terán esa responsabilidade".

"O que todos queremos é facer o mellor cos fondos que temos", insistiu, pero matizou que o actual "é un momento de reflexión". No entanto, ratificou que a revisión do modelo de financiamento "estará no primeiro semestre de 2009" tras avanzar "moito" coas tres universidades na elaboración dun novo proxecto.