Francisco Jorquera, portavoz do BNG no Congreso. AGN Un dos aspectos principais que o deputado salientou é o feito de que a cifra de algo máis de 2.000 millóns que este proxecto recolle “está por debaixo do total consignado para o exercicio do 2008”. Neste sentido, lembrou que o ano pasado e froito da negociación que o BNG mantivo co Goberno conseguíronse para Galiza 2.045 millóns de euros, mentres que “o proxecto para o 2009 que hoxe nos trae á Cámara contén unha cifra inferior”.

Jorquera deixou claro que o BNG vai traballar para “mellorar substancialmente as partidas para o noso territorio no tempo de tramitación do proxecto de Orzamentos no Congreso dos Deputados” e asegurou que “a nosa disposición ao diálogo é reiterada pero temos unha condición, que sexan uns Orzamentos xustos para Galiza”. “O BNG é consciente de que nun contexto de crise económica hai que ser responsábel e non se pode pretender solucionar a un tempo todas as carencias que Galiza ten en infraestruturas, pero aínda así necesitamos máis compromiso inversor”.

O nacionalista sinalou que “a día de hoxe temos unha posición moi afastada respecto a estes Orzamentos, mais exerceremos a nosa capacidade de diálogo para solventar moitas das insuficiencias e carencias que observamos no proxecto do Goberno”.

Eixo Atlántico

O portavoz nacionalista destacou algunhas cuestións referidas ás partidas proxectadas para a alta velocidade ferroviaria. Así, indicou que no que atinxe á conexión coa Meseta, “estimamos que o orzamento se corresponde en liñas xerais coa capacidade de absorción real.” Pero “non sucede o mesmo co Eixo Atlántico que para Galiza é tan importante ou máis que a conexión coa Meseta”.

Explicou que se contemplan uns 181 millóns para actuacións do Eixo entre A Coruña e Vigo “cando a capacidade de absorción orzamentaria é moito maior”. Ademais, subliñou que as partidas contempladas para o tramo Ferrol-A Coruña e Vigo-fronteira portuguesa “son anecdóticas”. Jorquera engadiu que, de acordo con esas partidas, “significa que estes itinerarios van seguir empantanados en fases de estudos”. Para Jorquera “é un feito que o Goberno se obstina en non considerar o Eixo Atlántico na súa totalidade, é dicir, entre Ferrol e a fronteira portuguesa”.