Os nenos asistentes ás actividades de Anxo Fariña no Verbum    1 / 2    

O debuxante Anxo Fariña, autor dos pelelliños e dos Megatoxos, impartirá na Coruña, no marco da feira do libro que se celebra na cidade do 1 ao 10 de agosto, un obradoiro de debuxo e graffiti a través das palabras.

Os obxectivos que se perseguen con este curso son dinamizar o uso da lingua galega na pre-adolescencia; incentivar a creatividade en galego e, desde o galego, asociar o uso da lingua con actividades do interese desta franxa de idade; asociar galego e modernidade e fomentar a creatividade por grupos.

Debuxos de múltiples lecturas

Na primeira parte do obradoiro, que terá lugar o mércores 6 de agosto dente as 12.00 ás 14.00 horas e das 17.00 ás 18.00 horas, explicaráselles aos asistentes a relación entre signos e letras e a súa evolución. Farase ademais un pequeno xogo no que a partir de letras os asistentes creen debuxos con significado.

Unha vez feitos os bosquexos, pasarase a explicarlles aos rapaces a técnica relacionada co graffiti do stencil ou pintado a través de plantillas. Finalmente e por grupos, os asistentes ao obradoiro farán en grande as súas creacións con sprays nun papel a tamaño mural, que logo poderán levar con eles ao seu centro de estudos.

A continuación, e unha vez repartido o material, explicaráselles aos asistentes a relación entre debuxos e letras. Utilizando o sistema do libro, crearanse debuxos a partir de palabras dunha forma guiada. Finalmente, animarase aos mozos a crear as súas propias composicións misturando palabras e debuxos creadas con letras dotadas de significado, para acadar pequenos "poemas visuais".

A segunda sesión celebrarase o xoves 7, de 12:00 a 14:00 horas.