PUBLICIDADE
Sábado, 13 de marzo de 2010
Portada  |  SOCIEDADE   RSS  |  Xeral   RSS
Toponimia
De Rabo de Porco a Mansiño

Redacción .  As curvas que presenta un vial do Concello de Poio é o motivo polo que unha rúa da parroquia de Raxó leva por nome Rabo de Porco. O topónimo vai ser cambiado por Mansiño logo de que un grupo de veciños iniciase unha campaña para conseguir a modificación da denominación.

Reloxo 23.06.2008 | 12:09
TAGS: Rabo de Porco , Concello de Poio , Mansiño , toponimia , Gonzalo Navaza ,

As curvas déronlle nome a Rabo de Porco, un vial da parroquia de Raxó As curvas déronlle nome a Rabo de Porco, un vial da parroquia de Raxó. Flickr A comisión municipal de Urbanismo vén de estudar a proposta dun grupo de veciños que viven en Rabo de Porco para cambiarlle o topónimo do vial no que viven. E é que algúns dos habitantes láianse das continuas mofas que reciben cada vez que alguén lles pregunta polo seu enderezo. Os que iniciaron a campaña para cambiarlle o nome ao vial apuntan que Rabo de Porco non se corresponde coa denominación tradicional, que segundo revelan era Portería.

Pola contra, outros veciños defenden o topónimo e non ven motivo ningún para que modifiquen a denominación que “leva toda a vida”. Pola súa banda, o alcalde do Concello de Poio, Luciano Sobral, asegurou a semana pasada que o topónimo é Rabo de Porco dende hai moitos anos, “eu lémbroo así toda a vida”. Segundo Sobral, o grupo de veciños que pediu o cambio de nome do vial xa o tentara modificar hai anos, aínda que daquela non se aprobara a nova denominación.

Mansiño, a nova denominación

A petición do cambio de topónimo, foi aprobada polos concelleiros a pasada semana. Na comisión municipal de Urbanismo acordouse que a nova denominación do vial será Mansiño, logo de que os veciños propuxeran este nome xunto a Portería ou Quinta. Agora, a modificación terá que ser aprobada no Pleno. A continuación, deberá publicarse no boletín oficial e no padrón municipal. Así que durante os vindeiros meses o futuro Mansiño seguirá a ser Rabo de Porco.

Un topónimo 'como outro calquera'
O estudoso da toponimia, Gonzalo Navaza, sinala que as connotacións negativas do nome do vial derívanse das visións deformadas dos propios veciños e non do topónimo. “Rabo de Porco é un topónimo normal, como outro calquera”, apunta. De aí que non considere necesario o cambio de denominación da rúa. “Eu defendo o topónimo tradicional e non os bautizos de rúas con nomes inventados, porque o topónimo é patrimonio”, engade o profesor da Universidade de Vigo.

Navaza asegura que posturas como as que adoptan os veciños que iniciaron a campaña para cambiarlle a denominación ao vial de Raxó teñen relacións “con prexuízos relativos á lingua”. “A xente ten que modificar as súas connotacións”, sinala. “Se no canto de ser Rabo de Porco chega a ser Rabo de Unicornio seguro que o verían bonito”, conclúe.

Oxford, Porto de Bois

O experto en toponimia lembra un caso polémico que tivo lugar ao pórlle nome aos viais do campus universitario vigués. “Un deles denominábase tradicionalmente Porto de Bois, pero había quen rexeitaba pórlle ese topónimo”, revela. “Había profesores que consideraban que ao enviarlle algunha nota a catedráticos estranxeiros cun enderezo que puxese Porto de Bois ían quedar mal”, lembra. “Eses profesores non sabían que Oxford significa en inglés Porto de Bois”, apunta.
COMPARTIR Envía a Chuza Envía a Facebook Envía a Menéame Envía a del.icio.us Envía a Digg Envía a Google Bookmark Envía a Yahoo My Web Envía a Technorati Envía a Barrapunto Envía a Domelhor
Imprimir     Tamano Menos Tamano Mas
VOTA
© 2010 A Nosa Terra
Principe 22 - Baixo. 36202 Vigo
Tel. 986 22 24 05.

info@anosaterra.com
diariodixital@anosaterra.com
Delegación Santiago
Tel. 620 91 70 56

Publicidade:
Tel. 616 90 46 88
Tel. 986 43 38 30
publicidade@anosaterra.com
PDF  Descargar Tarifas
Edita: Promocións Culturais Galegas S.A.
Vicepresidente e Conselleiro-delegado:
Afonso Eíré López

Director: Manuel Veiga Taboada
Subdirector: Xan Carballa Alonso
Coordenador Dixital: César Lorenzo Gil
Edición: María Obelleiro Hermida
Charina Giráldez Río
Premio EGANET 2008 - Web Comunicación Empresarial
Valid XHTML 1.0 Transitional Valid CSS!
Pedro Figueras Comunicación Opsou